迷你佛跳牆

這味餸有花膠, 海參, 瑤柱, 花菇和豬手, 是囝囝摰愛, 祝他生辰快樂, 身體健康, 學業猛進, 心想事成!

今天他們都有幾聲咳, 因此, 暫時唔食雞了, 有蒸魚頭和灼菜心, 清清地, 他們也食得好開胃呢!

我們的佛跳牆, 價廉物美, 骨膠原蛋白豐富, 一般家庭都可負擔得起, 而且長期食用, 更有滋補養顏之功效!

迷你佛跳牆

材料：

1. 己發好海參四小隻

2. 瑤柱六粒浸四小時,軟身,用浸瑤柱水,原粒蒸一小時

3. 花膠筒8 隻, 隔夜浸透，以薑蔥出水,反轉洗淨

4. 豬手一隻, 拖滾水, 刮洗, 用生抽兩匙, 薑片及片糖一塊, 水兩碗, 煲20分鐘,取出浸入冷凍水中去油,備用.

5. 冬菇六隻, 浸透洗淨 ,用生抽,糖,油等各半匙醃好, 蒸30分鐘,

6.上湯1杯 ,金華火腿一兩,切片 ,薑汁 ,酒各一匙

7.芡料：蠔油 兩匙, 生粉, 麻油各一匙

做法：

1. 用上湯加薑汁酒滾起，1--6項全部材料排放在煲內，中火煲20分鐘, 收慢火,繼續煲40分鐘,

2. 蠔油加生粉, 水半碗搞勻, 打獻. 再滾3分鐘, 落麻油和芫茜即成。

註腳

* 浸發海參做法

準備 薑片, 蒜粒, 蔥段各適量


做法：

1.浸海參的水要清潔, 器皿一定要沒油, 否則, 海參在浸發過程會爛掉,

依海參大小, 決定浸發時間,兩天至五天不等, 每天要擦洗一下,和換水.

2. 用薑起鑊加水放浸透海參滾  5 分鐘，過冷水，再重覆煲滾水,加蒜瓣和蔥段,放海參出水多一次。

 * 海參, 瑤柱, 花菇, 花膠等物, 平日有空時, 可先整好,放冰櫃保存.